小白觀點：o靚模prof可乘虛闖政壇

暑假過咗之後，o靚模呢個牌頭已經變成負資產，冇一個肯認自己係o靚模，個個都想升呢做「模Art」，以為咁就可以脫胎換骨。好彩小白老弟嘅女神露暈娜見識高幾班，模特兒Artist有幾巴閉啫，阿姐依家入科大講talk，做模特兒Professor，即係「模Prof」，問你服未？

其實以露暈娜咁有腦，邊甘於做「o靚模Prof」吖！意大利政壇美女如雲，性感炸彈狂炸歐洲議會；近近哋嘅日本亦彈出一個美女議員田中美繪子，佢有「政界井上和香」嘅美譽，聽個朵就知係真材實料啦，前排卒之畀人翻舊帳發現佢拍過A片，身材仲勁過井上和香添呀！o靚模既然冇工開，不如趁五區總辭乘虛而入都好喎！

網址：www.sunsiupak.blogspot.com

網友觀點......

Gloria

娜姐真係掂，大學應該辦o靚模學系，搵娜姐做學系院長，教大家o靚模入行秘笈，保障就業。

詠塋

wow，一定要去捧吓場，Chrissie我哋支持你！

豬仔

Chrissie個攬枕好好攬啊！唔知今次會有咩紀念品呢？Chrissie毛巾呀公仔呀都好吖。

Michael

都唔知依家啲大學搞乜，搞埋晒啲o靚模talk，俗氣到死，成個校園we嘩鬼叫，真係一代不如一代。

阿豪觀點：「解構」「解扣」都無任歡迎

大家唔好再話o靚模冇文化喇，周秀娜今個月七號就殺入科大，出席一個解構o靚模現象同o靚模風氣利與弊嘅講座，其他講座嘉賓仲包括前高官添，o靚模直頭由性感女神進身為文化大師呀！

但咪住先，請周秀娜嚟解構o靚模現象，似乎就有啲商榷餘地嘞。大家諗吓啦，如果o靚模可以解構o靚模現象，咁試問農場裏面嘅乳牛，又可唔可以解構成個乳製品市場嘅發展模式同前景呢？豪伯咁講，絕對唔係想貶低啲o靚模，只係想話「當局者迷」，「解構」重任，都係留畀一眾專家去做啦。

計我話，無論o靚模「解構」又好、「解扣」也罷，總之眼睛有得食冰淇淋，豪伯一律無任歡迎也！

網址：www.lukchiho.blogspot.com

網友觀點......

尖子

最好o靚模走埋入去教書啦，如果我係學生，我仆到去報讀添呀！

文禮陸

啲o靚模邊度識嘢㗎，係咪吸引人嚟聽嘅噱頭咋？

小龍友

係咪性感出席先？會唔會引嚟大批龍友撐場呢？

奧雪

樓上小兄，我睇番新聞，原來現場唔畀攝影，我覺得有少少趕客feel囉！

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。