話說領匯○四年起接管一百七十八個公屋停車場,本來呢,如果領匯要將啲車位租畀非住戶,就要向政府交豁免費嘅,但係○七年豁免期滿之後,領匯一直無向政府申請延續豁免,但係啲車位就繼續租畀邨外人。
呢個問題一拖幾年,最合理嘅做法就梗係即刻向政府申請延續豁免並交番豁免費,等啲車主有得繼續泊車,政府快啲收番筆錢啦。之但係,死得佢個領匯吖,佢哋為咗自保,竟然一刀切趕走晒班邨外車主,搞到大批車主無位泊,有租開黃大仙龍翔中心車位嘅傷殘人士投訴,話佢唔係商場租戶,但就喺附近返工,而左近啲停車場又唔多方便傷殘人士,又未必可以泊到個傷殘車位。有傷殘人士團體批評,領匯趕絕傷殘車主,直頭不近人情。
鬼咩,對於領匯嚟講,一斤人情值幾錢?「道義放兩邊,利字擺中間」先係永恒真理!莫講話啲邨外車主租唔到位,就算邨內人租到都未必係一件好事。有車主反映,佢哋向領匯申請泊車許可證,除咗填個人資料外,仲要交牌簿、身份證副本、租約……連所有屋企人嘅資料都收埋,查家宅咁滯。
咦?領匯打開門口做生意,掠水就掠水、搶錢就搶錢啦,到底收咁多資料嚟做乜?原來,申請表蠱蠱惑惑寫住「管理有限公司可使用及向其他合法機構透露本申請表格提供之資料,作市場推廣、行政、信用覆核、帳務追討及法律用途」。
亦即係話,閣下只要大筆一揮,一簽表格,就等於將所有私隱免費送畀領匯,佢哋不但有權翻查你嘅財務狀況,甚至可以將你闔家資料攞嚟做市場推廣,如果賣畀其他公司,更可以乘機再賺一筆。
叮!現代管理學有云,顧客嘅利益就係公司最大嘅利益,但係對於領匯嚟講,公司利益至高無上,而顧客嘅利益不但唔係利益,甚至可以攞嚟牟利嘅。
領匯舊年逆市狂賺十八億,喺豬籠入水嘅情況下,仲可以諗縮數諗到呢個地步,真係畀佢吹脹。而政府對領匯為富不仁袖手旁觀,更係天下一大奇聞。太一叮決定,一於綁埋呢對難兄難弟,起勢叮爆佢哋鎯鎯!