環境局局長邱騰華上任後推出多項環境措施，但有唔少人都質疑佢急於求成，有啲措施流於表面化，對環境嘅實際幫助唔大。例如膠袋稅的確令超市減少咗派膠袋，但同時令垃圾袋嘅需求大增，整體膠袋生產量不跌反升。停車熄匙立法亦被指成效不大，質疑政府只向車主同職業司機開刀，唔敢郁香港嘅最大空氣污染源頭電力公司。
邱騰華尋日喺北京睇閱兵時大讚個天好藍好清，又話只要有願望就可以做到，香港應該努力學習吓。眾所周知北京當局為免閱兵儀式受天雨影響，特別用最新嘅科技打散晒天上嘅雨雲，唔通特區政府都引入有關科技，以實現煲呔曾嘅藍天大夢？記者於是追問邱局長，佢立即尷尷尬尬咁話：「唔知喎，等我了解吓先。」原來佢根本唔知北京尋日嘅藍天係人為製造嘅，畀記者問兩嘢就露晒底。
出席同一場合嘅保安局局長李少光就大讚國家嘅國防軍備改進咗好多。問佢香港有冇需要學習吓，佢就強調香港奉行一國兩制，防務工作有中央代勞，唔需要自行備配咁多飛機大炮，冇畀記者跣到。嗱！李少光同邱騰華簡直高低立見呀！