之前客串做過DJ嘅肥亨，下星期六正式有自己嘅節目出街；同之前唔同嘅，呢份係肥亨辭官後第一份受薪工作，佢亦從此告別無薪嘅義工工作。為襯番舊年被港大請咗做經濟金融學院榮譽教授，佢嘅新節目叫《馬教授，你好！》佢仲請咗幾個大學生一齊做主持，就時下一啲熱門事件，例如口靚模效應同青少年吸毒等嘅問題交流吓意見。

另外，聽聞肥亨會成立一個基金，將以後佢所有工作得番嚟嘅報酬放喺呢個基金度，作為慈善用途。為咗令基金「身家豐厚」啲，佢更會積極考慮接多啲受薪工作，只要唔太操勞，而又係佢熟悉有興趣工作，佢都會好積極考慮，實行幫基金打好根基咁話喎！