但最令人估唔到嘅係個網誌開張短短二十四小時，任總仲未開始發功，已累積逾百名網民回應同留言，大批支持佢嘅網民主動圍踩煲呔曾同佢嘅繼任人新任金管局總裁「攞命陳」陳德霖，令網誌變咗成個反政府基地咁。

當中大部分都係讚揚佢嘅任內工作，但亦有唔少人其實明褒任總、暗踩煲呔曾同攞命陳嘅。包括形容佢係「極少數有能力嘅政府官員」、「香港最能幹嘅領導人」、甚至建議佢參選特首等，又話任總已成為金管局甚至香港金融中心嘅象徵標誌，佢退休後香港「庸才充斥，怎不令人擔心」，質疑「庸人怎處理港人金庫，會否一落千丈呢」？

網民更用唐代名將郭子儀比喻任總，除咗佢喺金融風暴成功擊退國際大鱷，同當年擊退外敵嘅郭大將軍有得揮之外，郭子儀經歷四朝皇帝而不倒，以及「功高蓋主而主不疑」嘅事迹，估計都係網民攞佢嚟同任總比較嘅原因。