北京連日來陰雲密布，到尋日朝早竟變為藍天白雲，風雲變色令在場閱兵嘅人大政協為之驚嘆，港大校長徐立之都話：「天空變藍咁都做得到，中國真係乜都得！」連第三次上京睇閱兵嘅行政會議召集人CY梁振英最為驚訝，估唔到一夜之間有咁大變化，一起床就見藍天白雲，太陽高照，搞到個個曬到燶晒，國家控制天氣真係神乎其技。
CY喺城樓上睇完整個閱兵儀式後，覺得最震撼就係尾段小朋友放氣球上天空，然後衝上金水橋，隨即奏起愛國歌曲《歌唱祖國》，代表中國未來一代，扣人心弦。全國人大常委范徐麗泰就話，最感動係體會國力強大才能組織動員到咁大規模嘅群眾，而五十幾個少數民族跳舞，亦反映國家嘅包容。范太話閱兵場面咁震撼，佢帶備相機，影閱兵又影埋花車巡遊，影咗成六十至七十張相添！