叫咪狂加租

其實高醫生平時絕對唔會亂咁向人開火，但尋日佢出席一個酒會時，一講到領匯就皺晒眉兼有啲火起。高醫生話明白領匯作為上市公司，好多嘢要喺股東利益角度出發係無可厚非，但今次領匯瘋狂加租好幾倍，佢就覺得實在好有問題，完全唔似純粹嘅商業決定。因為咁會逼到啲街坊醫生完全生存唔到，最後除咗執笠之外都冇第二條路行，最後對領匯都冇乜着數。

高醫生除出口幫班街坊外，仲打算將語言轉化成實質行動。事緣呢個瘋狂加租事件開始升溫，下星期六將會有六百個街坊企出嚟，嚴正抗議領匯係咁加租；高醫生就未決定係咪會參加呢個遊行，但就表示如果遲啲醫生搞任何抗議行動，佢必定會支持咁話，即係撐硬班醫生啦！高醫生仲呼籲領匯應該要履行番啲社會責任，照顧吓班基層市民，唔好淨係掛住賺錢咁話。

其實唔同界別人士都炮轟過領匯亂咁加租，正如立法會醫學界代表「怪醫」梁家騮就多次要求政府買番領匯，救一班街坊於水深火熱之中；但無奈政府闊佬懶理、冇乜聲氣，再係咁落去，分分鐘官逼民反，到時傷嘅咪又係特區政府嘅民望囉！如果呢個政府有番啲智慧，就應該的起心肝拆咗呢個領匯炸彈啦！