小白觀點 搞「新光戒毒戲院」掂硬

依家啲後生仔女，索K濫交成風，但仍然有學校冇放棄過，好畀心機度橋春風化雨。呢嗱，有間學校竟然發起粵劇抗吸毒、大戲反援交喎，如果佢哋開戲，小白老弟好有興趣去捧場，睇吓小玉妻點樣同李十郎唱：「君虞，君虞，妾為女子，援交如斯；君是丈夫，索K若此。」不過呢間學校有咁勁嘅絕世好橋，應該要早響啦，粵劇界之前為咗保留新光戲院同埋活化前北九龍裁判署，都唔知花咗幾多口水呀，特區政府班高官只係識得三大男高音，邊知道有個新馬師曾吖，如果早啲知道依家開正索K援交嗰瓣，掟個「新光戒毒戲院」、「北九龍少女司署」大計，掂硬！

網友觀點...X）...

[　小肥羊　]我就唔信喇，粵劇咁out，G仔睇吓G模聽吓林峯謝安琪好過啦！

[　陳 Sir　]後生仔連粵劇歌詞點讀點解都未知啦，點可能令後生仔有興趣呀，一定係班校長老師自己想玩就真！

[　 Janis 　]援交為搵錢，吸毒為使錢，粵劇為乜呢，點插入去呀！

[　雞蛋仔　]都好嘅，等學生認識粵劇文化，唔係粵劇就失傳㗎啦。不過講到咁誇抗毒援交就無人信啦，藉口！

網址：www.sunsiupak.blogspot.com

阿豪觀點 等學生咿挹時間都冇

粵劇除咗長者鍾意之外，原來唔少後生仔女都有興趣。有間學校仲叫啲同學仔女學粵劇，等佢哋有番啲細藝，唔使咁得閒走去索K又或者援交，唔知大家覺得呢一招「粵劇抗吸毒援交」使唔使得？豪伯我就絕對支持嘞！

先講援交問題。《帝女花．香夭》都有得唱啦：「偷偷看，偷偷望，佢帶淚帶淚暗悲傷」，公主對住駙馬都要「偷偷望」，點會好似依家啲後生咁，三句唔埋就要喺樓梯咿挹，更莫講話援交啦！至於索K問題亦唔難搞。你知啦，家陣睇大戲有咩場地呀，嚟嚟去去得個新光戲院，高山劇場個場地到依家都好似冇厘聲氣咁，粵劇迷為更多演出場地抗爭都唔得閒啦，仲邊有時間去索K呢？

網友觀點...X）...

[　匿　名　]在學校推廣粵劇，中學生多樣嘢學，粵劇界多咗捧場客，一舉兩得。

[　尖　子　]計我話鍾意得粵劇嘅，大多數都係斯文同乖嗰隻啦，要抗毒，不如教佢哋空手道好過！

[　劈　直　]都好嘅，等啲G仔有番啲細藝，又可以弘揚傳統中國文化，一舉兩得。

[　廖尚恒　]叫啲G仔G妹學粵劇，用途有幾大就難講啲啦。因為始終粵劇畀人嘅感覺較為「老餅」，到底青少年buy唔buy呢？

網址：www.lukchiho.blogspot.com