入口蔬菜批發商會尋日話，上個禮拜同北區區議員一齊去深圳批發市場同南山配送中心，親眼睇到不法之徒將買番嚟嘅產地來源證貼咗喺不明來歷嘅蔬菜度，然後運嚟香港賣。佢哋仲將成個過程偷拍落嚟添。

商會多年來不斷向內地同港府投訴走私菜氾濫問題，但一直未獲解決。佢哋直指食物及衞生局局長周一嶽打擊走私菜不力，唔排除月中去政府總部抗議，仲會出動兩百幾架貨車遊行到中聯辦同堵塞文錦渡宣洩不滿。

呢個政府真係唔踢唔郁，唔爆大鑊唔做嘢。一見菜販有意將抗議升級，食衞局尋日就話，十分重視內地供港蔬菜嘅安全，已經將「假產地、真標籤」問題知會內地。

叮！走私菜問題存在多年，本報亦率先直擊報道過內地菜利用假證流入本港，但當局一於少理，開頭一味話冇咁嘅事，後來又諸多理由唔去管，走私菜賣通街，守法菜販生意根本做唔落去，拍晒烏蠅。菜販走投無路，惟有上街，淨係今年已經發起多次抗議，甚至揸車堵塞文錦渡。

走私菜問題一拖再拖未解決，菜販隔三幾個月又揸車堵塞文錦渡，但政府齋噏「以民為本」，唔去做啲嘢向市民交代，反而將問題推晒畀內地，簡直係以民為笨。

走私菜暢通無阻殺入香港早就係公開秘密，人人都知道，係班高官詐唔知啫。本報早就踢爆，除「假產地、真標籤」外，走私客仲當海關冇到，每日將幾百斤未經檢疫嘅蔬菜經口岸旅客通道湧入香港，關員任由佢哋大模廝樣咁掂行掂過；而食環署喺街市亦未設法堵截，各部門齊齊「放軟手腳」。

周一鑊居然話蔬菜走私唔嚴重，仲將責任推晒畀海關。後來愈爆愈大鑊，當局至改口，承認走私菜問題確實存在，但係就話唔能夠去內地執法，無能為力，即係話乜都唔使做。

叮！無論係「假產地、真標籤」定「螞蟻搬竇」方式走私入嚟嘅蔬菜，都冇經過檢疫，有冇含對人體有害嘅化學物質，根本冇人知道，市民更加無從分辨。咁大嘅食品安全隱患，當局居然一句「唔能夠去內地執法」，就將責任推得一乾二淨，咁仲唔係攞市民生命安全嚟較飛？

家陣唔係叫班高官去內地拉人，而係做番本分啫。如果港府就走私菜問題同內地有關部門加強溝通，促請對方加強執法；如果各口岸睇得緊啲，抽查密啲，有乜理由走私菜會長驅直入，搞到守法菜販冇啖好食，要齊齊上街抗議吖？

叮佢個鎯鎯！政府唔監唔管，保障港人食得放心嘅蔬菜產地來源證，依家變咗不法之徒攞嚟打正牌走私嘅護身符。有機制又唔嚴格執行，推出多多措施都嘥氣啦！