建國六十周年慶典尋晚拉開序幕，中午十二時開始，京城核心範圍幾乎戒嚴，北京市二環之內範圍全面封鎖，酒店唔可以對外開放，店舖全部暫停營業，下晝三點就封鎖北京飯店及長安大街，直至聽日凌晨先解封。尋晚嘅國宴，雖然得四菜一湯，但有份赴宴嘅人大代表都好開心，仲影咗張合照添。
據講參加國宴同今早閱兵儀式嘅人士要自動自覺接受安檢，禁止攜帶手機、樽裝飲料、相機、攝錄機、錄音設備同易燃物品。不過，政協林健鋒卻帶備大型單鏡反光相機同長短鏡，去到國宴時，大會就講明手機都唔准帶。
今朝重頭戲係閱兵儀式，有份上城樓觀禮嘅本港人士包括行政、立法及司法人員、十六名全國政協常委及全國人大常委范徐麗泰。
