海洋公園主席盛智文扮嘢有道，經常為海洋公園粉墨登場，搶盡風頭！不過，已經入咗中國籍嘅扮嘢文雖然話自己係香港人，仲成為建國六十周年慶典閱兵式嘅觀禮團成員之一，尋日上到北京更高呼：「我係中國人，我嘅感覺非常好，我愛北京。」不過，佢唱國歌就似唸經多啲，睇嚟今次喺北京出席咁多莊嚴場合，佢恐怕要咪嘴、扮識唱歌至過到骨喇。
扮嘢文尋日喺北京話：「我在香港居住咗三十幾年，已經當咗香港係自己屋企喇！」佢仲話，今次可以獲邀參加盛事，感覺好開心。雖然佢嘅愛國愛港情懷好澎湃，但講到唱國歌，佢都只能話：「I can try（我可以試吓）！」然後面對傳媒口噏噏咁，結果係扮嘢文唱中文歌冇人識聽，即使加埋幻想，都好難聽出盛智文唱緊國歌，現場只有一片哈哈聲。
見到自己嘅搞笑版國歌過唔到骨，扮嘢文即刻轉移話題，叫一眾女記者最緊要留意吓男朋友講「我愛妳」係咪發自內心！