五十五歲嘅鍾建新能文能武，曾經為香港新機場開幕禮設計紀念冊封套同封面，退休前任職警隊PTU沙展，兩年前離開警隊後全情投入創作同教畫，前港姐王愛倫都係佢高徒。建新喺佢嘅大埔畫廊餐廳透露，舊年萌生想創作一幅畫展示香港過去幾十年風雲人物嘅畫，刨書一輪後今年二月動筆，日畫廿幾小時，畫足半年完成呢幅有成十點三米長一點五米高嘅巨作。

建新已將佢幅作品印成巨型海報放喺餐廳內畀人觀賞，畫中不乏多位叱咤風雲人物，包括國父孫中山、長實主席李嘉誠、賭王何鴻燊、恒地主席李兆基、已故華懋集團主席龔如心等，夠晒大堆頭。龔如心嘅私人助理王禮泉睇過幅畫後非常欣賞，正義務協助做全球推廣。講開王禮泉，佢身在北京出席建國六十周年慶典活動，佢話會繼續龔如心遺願尋找失蹤嘅王德輝下落，亦會為中國發展出一分力。王禮泉係華懋老臣，呢張攝於○一年嘅相可以睇到，龔如心當時已帶同王禮泉與海協會會長陳雲林見面，當時陳雲林係中央對台辦主任。