本文重點
港澳回歸之後，兩個特區政府嘅表現經常成為焦點，並被攞嚟比較，但香港經常都敗下陣嚟。好似今次內地舉行建國六十周年慶典，邀請大批港澳人士北上觀看閱兵及出席宴會，港府觀禮團嘅二百幾人尋日晏晝先抵達北京，自行赴會嘅前港區人大代表吳康民早一日上京，尋日朝早九點幾已經到達駐地，但港府一個接待人員都冇，反而澳門政府就擺下迎賓處、有近十個職員迎迓，食咗閉門羹嘅康叔好扯火，喺酒店大堂大鬧：「參加乜嘢活動又唔知，幾時集合又唔知！」
港府觀禮團嘅駐地係戒嚴範圍以外嘅港澳中心，康叔冇隨大隊、前日已經上咗京，老人家習慣早睡早起，尋日朝九點半已到港澳中心大堂索取活動行程，點知負責接待嘅港府職員人影都冇隻。
肥仔張食國宴慶60大壽
相反，澳門就朝早九點有近十名職員坐喺大堂接待，康叔等到十一點仲冇下文，真係好扯火，狠批港府連建國六十周年慶典嘅接待工作都咁漏氣。
呢個時候，港府駐京辦有個別先行抵埗職員見狀知衰，立即向康叔「沙冧」，送上一本觀禮團手冊，但係行程都係未確定，只係畀康叔睇住先喎。
激氣嘢講完，富貴黨副主席張宇人就好開心，原來佢四九年九月三十日出生，啱啱早過國家一日生日，尋日佢喺六十大壽正日赴京，雖然冇得同屋企人慶祝生日，但佢話幾千人喺人民大會堂同佢慶祝，不知幾開心！國宴之後，有同行政協及議員出外飲嘢，「酒仙」黃宜弘仲唔知喺邊度班咗啲頂級茅台請佢哋飲，大家又為佢唱生日歌，呢個生日都好特別啫！