小白觀點
應該計埋超高薪公僕
本港貧窮人口增至一百二十四萬,創咗十年新高,有冇搞錯呀,呢個數字都唔知點得嚟㗎?
話時話,香港根本冇可能得咁少窮人,至少,加埋我同隔籬阿豪哥,應該有一百二十四萬零兩個至啱數。如果再嚴格啲,加埋十六萬個公務員,加埋特首,加埋三司十二局,加埋啲平機會呢種政治花瓶山寨王,貧窮人口肯定突破一百四十萬大關啦。
係呢,你可能會問,嗰班高官一個二個閒閒哋幾百萬年薪,咁仲叫「貧窮大軍」?有冇搞錯?
哎呀,數據呢家嘢,要科學一啲嘅計算,因為公務員嘅胃口真係有異於常人,例如紅酒唔係法國Lafite唔飲,雪茄唔係Cohiba唔食,靚車冇四千CC又唔坐。咁樣埋單一計,幾百萬年薪真係唔夠使o架。
網址:www.sunsiupak.blogspot.com
網友觀點......
信記
睇見個數字都驚,香港七百幾萬人,有百萬貧窮人士,仲話係國際城市,表面風光,有苦自己知。
Cindy
貧富懸殊咁勁,成日話經濟已經起飛,佢起飛,我就愈窮,何解?
Tommy
政府講咩六大產業救市幫窮人,一條毛我都見唔到,根本就係令窮人更霉,奸商更富,得把口。
Popeye
不如香港拍a million slumdog吖,探討貧窮下苦命香港人,話唔定有機會進軍荷里活。
阿豪觀點
政府餓死窮人當「滅貧」
最近統計數字顯示,本港貧窮人口達到一百二十四萬。呢個數字似乎令隔籬小白兄好唔開心,認為計漏咗我哋兩個窮鬼,實際本港應該有一百二十四點零零零二萬個窮人至啱。不過計我話,無論一百二十四萬,抑或一百二十四點零零零二萬都好,反正好似史太林話齋:「一個人死,是悲劇;一百萬人死,則是統計數字。」可能正因為咁,特衰政府先至會麻木不仁,講到明唔會喺施政報告裏面再派糖啩?
不過咁,就算呢一百二十四萬窮鬼真係全部餓死晒,都未必唔係一件好事,大家諗吓嘞,與其辛辛苦苦扶貧滅貧,倒不如直接同「窮魔」同歸於盡,連個窮人本身都窮死埋,費事佢哋一下唔小心又生幾件,咁到時香港貧窮人口將會呈幾何級數增長!
網址:www.lukchiho.blogspot.com
網友觀點......
靚仔
吓吓派糖,幼稚園咩,食自己啦!你兩位滿肚墨水,荷包腫脹,咪扮嘢啦!
達 人
嘩,百幾萬人,仲多過好多國家嘅軍隊人數啦,叫做「貧窮大軍」真係一啲都冇改錯名!
working class hero
最慘係喺香港做窮人差不多係死路一條,唯一辦法係停止製造下一代,避免跨代貧窮!
死窮鬼
香港成日自詡國際大都會,又話係咩「紐倫港」,點知周街窮人,政府除咗幫富商,仲識做啲乜?
發表方法
讀者如對本欄每日話題有任何意見,歡迎登入網址發表意見。本報保留採用刊登權利,不另通知,敬請留意。