筆者不禁失笑，口岸防疫，幾時有嚴謹過？尤其是周一鑊扮醒神嘅回答，更令我這個口岸兩地飄嘅常客笑到O晒嘴。周一鑊話：口岸填寫健康申報表仍有作用，可以方便追蹤某些特別個案，當然，這方面的可能性不是那麼大……周一鑊原來亦係「扮嘢王」，陳馮富珍唔喺香港一排，你都唔使扮晒英明神武，大家不妨做個快樂老實人，香港抗疫無方，進退失據，口岸填寫健康申報表根本就係得啖笑，每日嘥表格幾十萬份，求其寫個N年前嘅二奶電話、三奶地址，一樣過關冇問題！

筆者雖然冇日日過關，可是每周過關、逢假日過關，據筆者長久觀察及親身體驗，根本只要寫上任何數目字就可當電話號碼，有人查咩？有抽查對照過真假咩？筆者未曾見過，真係有事要追蹤，恐怕未必有效。陳太建議香港可逐步放寬口岸防疫，免去口岸填寫健康申報表，筆者覺得：與其是是但但填「表」，求求其其收「格」，勞而無功，擾民花時間，不如索性行行好，一次過取消口岸填寫健康申報表，所慳之紙，救番唔少樹木，肯定功勞多過從日本引入十部電動車。

施政首要務實，周一鑊無論怎樣扮英明神武，頂多又係「一切正常，糟糕透頂」！趁豬流感目前仍未變種，應老老實實的做點工夫，否則未到聖誕，但聞狂呻！