弊在負責監管酒店同埋賓館嘅民政事務總署一直闊佬懶理，唔死人唔做嘢。今年七月尖沙咀海防大廈發生奪命大火，先至同多個政府部門做場大龍鳳，巡查一百二十幢樓宇，當中只係得二十一宗懷疑違規經營賓館被檢控個案，講都冇人信。

叮！無牌賓館好似計時炸彈咁，唔知幾時發生火災，遊客生命當然毫無保障啦。咁都不特止，依家仲發生埋「水災」，連累附近嘅住戶添呀！

原來依家好多無牌賓館東主為咗賺多啲，擅自將單位改頭換面，豆腐膶咁細嘅地方，佢有本事改裝成多個出租房間。最厲害嘅係，每間房內仲會加裝埋水喉以及重新接駁污水喉，有獨立廁所同浴室，唔係講笑，設備拍得住酒店㗎。問題係，好多工程都唔合規格，搞到喉管漏水，樓下住戶就冇運行嘞。

呢嗱，有個住喺尖沙咀溫莎大廈嘅小市民好唔好彩，樓上正正就係呢啲漏水無牌賓館。佢喺○二年已經向食環署求助，點知署方求其查兩查，就話查唔出滲水嘅原因，將個案一腳踢去屋宇署同埋水務署跟進。

叮佢個鎯鎯，係人都知呢兩個部門同食環署一擔擔，一樣係懶到出汁，一味卸得就卸，當然又係查唔出啲乜嘢啦。直到○五年，呢個小市民嘅天花板依然漏水，佢再次向食環署投訴，食環署再將個波交畀屋宇署。結果係點，唔講都知啦。

屋宇署最叻就係用「冇即時危險」做擋箭牌，翹埋手大條道理唔做嘢。咁乜嘢叫「即時危險」呢？簡單啦，據太一叮嘅理解，如果冇塊幾呎長幾呎闊嘅石屎跌落嚟壓親人，有排都未達到即時危險標準。所以呢個單位只係漏吓水之嘛，屋宇署肯採取行動至奇呀。

呢個小市民畀幾個政府部門拖拖拉拉幾年，依然鬥志頑強。○七年再次向食環署投訴，今次署方終於證實樓上嘅浴室地台防水設施唔妥，但拖拖吓，成件事至今竟然仲未解決。

冇辦法啦，食環署嘅工作效率龜速，已經係出晒名㗎啦。根據資料顯示，○六年七月至今年八月，食環署喺油尖區一共接獲二千八百幾宗滲水投訴，但結案嘅只得一千七百四十一宗，即係話當中有四成未結案。可想而知，食環署係幾咁廢吖！

叮佢個鎯鎯，幾個部門互相卸責確係離譜，但溯本追源，一日都係民政事務總署長期瞌眼瞓，冇監冇管，先至搞到無牌賓館成行成市。講到底，署長陳甘美華當然責無旁貸！

計太一叮話齋，香港人對水災已經見怪不怪，不如咁啦，陳甘美華署長大可翻炒大澳嗰套水浸預警系統。當無牌賓館嘅室內水位浸到一個成年人心口時，即刻向樓下嘅居民發出水浸預警短訊吖，笨！