佢喺大批記者簇擁下，行咗兩段夾埋十分鐘都唔夠嘅路程去教堂早禱同落政府總部開行會，但被問到會否持之以恒時就表現得好保留，仲搵一大堆理由搪塞。佢好似好無奈咁話：「今朝去教堂時，有二十幾個前線記者追住我；由禮賓府行過嚟（政府總部）時，又有差唔多五十個傳媒追住我，我哋嘅保安同警衞都需要增加人手……又唔知前線記者會唔會歡迎，所以我要諗清楚。」淨係佢呢番話，就聽得出佢講就天下無敵，做就冇心冇力啦，簡直（火羅）爆。

唐唐尋日約埋律政司司長搭的士去中環政府總部開行會。

但完會後竟然大模廝樣咁登上座駕離開。

綠色和平項目主任古偉牧即時反諷煲呔曾過分放大自己嘅新聞價值：「如果養成習慣就唔係新聞啦！」

唐唐爛騷穿崩

同煲呔曾一樣（火羅）爆嘅仲有政務司司長唐唐。官邸喺半山白加道嘅唐唐尋日約埋律政司司長搭的士去中環政府總部開行會，但開完行會後，唐唐離開時竟然大模廝樣咁登上座駕，擺明連做騷都交行貨，一見唔到鏡頭就回復真我。