座談會嘅發言嘉賓，粒粒都係唔同領域嘅星級人物，但要佢哋對住台下三百幾人表演煲冬瓜，即時變晒排隊入試場嘅小學生咁戰戰兢兢。

好似有「新界王」之稱嘅劉皇發咁，兩、三個禮拜前一收到通知，即刻搵私人老師惡補普通話，上禮拜佢帶屯門區議會去日本考察，都隨身帶埋MP3機，不停聽普通話老師嘅錄音，作填鴨式苦練。補課兩個禮拜，發叔尋日嘅煲冬瓜依然有人聽唔明，佢發完言落咗台，仲怨自己講得太快添！其實，七十歲人有咁嘅勇氣都算唔錯啦！

發叔煲冬瓜唔多掂，代表香港青年界別發言嘅香港青聯主席陳仲尼相比之下就字正腔圓得多，常務副主席葉振都同副主席霍啟剛亦有嚟撐佢場。陳仲尼話冇正式學過煲冬瓜，純粹因為成日返內地交流，聽得多，自然講得好，篇講稿佢自己親手寫，親手改，所以尋日五分鐘一氣呵成，唔使睇稿讀。