喺港大頒授名譽大學院士銜嘅人士中，有一個人唔係社會知名人士，可能大家都未必認識，但對於一班港大人嚟講，佢嘅地位卻舉足輕重，呢個人就係喺大學堂工作超過四十年、宿生稱為「三嫂」嘅袁蘇妹嘞。三嫂曾擔任過宿舍四級廚師、助理廚師同宿舍服務員等職務，但佢作出嘅貢獻卻遠超過呢啲職位，佢對宿生嘅照顧無微不至，可算係宿舍嘅靈魂人物，好多名人都受過佢照顧。
三嫂同港大結下半生緣，一九五七年偕丈夫承包大學堂伙食服務，四十年嚟每日負責照顧宿生嘅起居飲食，甚至成為佢哋嘅家庭、學業同就業顧問，仲做埋愛情顧問添！港大尋日介紹三嫂時，話佢經常勸喻拍緊拖嘅宿舍男生珍惜眼前人，叫啲男仔對女朋友好啲；每當宿生娶新抱時，都例必請三嫂飲喜酒，甚至斟新抱茶畀三嫂飲。
曾受三嫂照料嘅名人包括馬會主席陳祖澤同行會成員梁智鴻等都到場恭賀，當三嫂授銜嗰刻，一眾港大舊生齊齊揮手吶喊，場面好感人！