香港歷史博物館尋日展出名為「百年中國」嘅文獻同圖片展覽，政界名人爭相捧場，連讀番書嘅經濟動力成員林健鋒都有份。佢話以前港英殖民地年代讀書只識孫中山，山西淨係識「竹葉青」，但回歸後經過惡補，已加深對國情嘅認識，仲對國家版圖有遠大宏願添！
佢話自從做咗政協後，經常到內地考察，對國內地理位置熟咗好多，好似山西省咁，原來除咗「竹葉青」外，仲有好多煤礦，又知貴州嘅地理位置，講到好似成個中國通咁。但一講到中國有幾多個省就大出洋相嘞，佢話：「大概有四十二、四十三個省咁上下啦！」國家版圖幾時變得咁大o架？
其實國家只係有二十三個省、四個直轄市、五個自治區同兩個特別行政區，就算加埋都冇四十幾咁多啦！
