六大宗教界尋晚舉行聯歡酒會，盛傳健康麻麻嘅寶蓮寺住持釋智慧撐住拐杖到場，曾暗示年底交棒嘅佢忽然改口風，話今年內唔會換人，但話口未完佢就爆出地位崇高嘅首座和尚名額，由現時兩人（健釗法師同宏通法師）加到三人。唔通未來方丈人選之爭唔係二揀一，而係三揀一？咁戰況咪更加激烈囉？
釋智慧話有感自己上咗年紀，講嘢冇以前咁好，年底將會邀請一位內地高僧來港擔任首座和尚，幫手講經。查實佢身邊一直有健釗同宏通做左右手，分別主管行政同佛學研究，依家突然破例加多一名首座和尚，用意耐人尋味。釋智慧話，呢三位都係未來方丈，最終人選會由董事局決定。新首座和尚到底係咪「空降方丈」？大家要拭目以待嘞！