社會福利署前署長「阿魚」余志穩退咗休個幾月，好多人關心佢過去一直忙到「冇朋友」，會唔會適應到突然靜落嚟嘅退休生活呢？早幾日喺中環見到阿魚，佢話退休頭一個月仲未覺得唔慣，事關忙於還家人債同朋友債，好似早幾日就約咗幾個好朋友去食晏傾偈。
對於家人債，阿魚相當着緊，所以上月退休後就即時帶埋老婆同有「理大周慧敏」綽號嘅愛女余文蔚，去咗日本同泰國玩咗大半個月。至於旅行以外嘅日子，阿魚每朝早都會同太太行山晨運，強身健體之餘，又可以當拍拖。
阿魚仲話依家同幾間大專院校商討緊義務教學工作，盡量將個人知識同經驗傳授畀學生，但就絕對唔會學「庸官殺手」王永平咁發聲批評政府喎。