喺港台風波當中，員工話未能爭取港台獨立好遺憾，但對於廣播處長、港台台長「麒伯」黃華麒嚟講，應該係飲得杯落至真。

點解咁講？喺公開招聘呢個位時，麒伯喺首輪申請，但次輪至選中，而政府委任六十五歲嘅麒伯做廣播處長，好多人以為佢今次出山，首要任務係要陰乾港台，但當時已經有消息話搞好港台呢個爛攤子嘅管治，先至係最迫切嘅任務，況且政府內部根本冇諗住陰乾港台，而係放佢一條生路。

政府另覓人選盞自找麻煩

據聞，政府搵麒伯係諗住進可攻、退可守，所以任期只係兩年，事關若果檢討結果決定港台要變成另一公共廣播機構，到時新嘅揸fit人必須係個新人，所以麒伯只係過渡性質。

事隔一年，政府果然放生咗港台，而喺上個月底港台員工批評麒伯唔肯參加遊行，當時麒伯出席員工大會時大大聲話唔信政府陰乾港台，唔通佢一早就收到風？

既然港台維持原狀，咁麒伯嘅去向又點呢？睇吓依家嘅形勢，似乎佢可以做落去。何出此言？試諗吓，當日招聘廣播處長時，就鬧出一場為周融「度身訂造」嘅風波，而政府選中麒伯嘅理由係冇人比佢更適合，對呢個超弱勢政府嚟講，根本冇可能再承受重蹈「度身訂造」風波覆轍嘅打擊，再講亦根本冇人可搵，否則就等如自打嘴巴。

聽聞麒伯接掌港台後，處事中規中矩，冇犯大錯，政府亦犯不着自找麻煩，費事另覓人選時又搞出大頭佛，所以大路去諗，完咗兩年約後，麒伯應可繼續勾實港台做其台長也。

以麒伯之齡，喺公務員架構當中早就要退休，依家佢仲可以繼續坐首長級第五級職位同人工，可以話係港台風波中最大嘅得益者，唯一畀人唱嘅係佢係最老嘅廣播處長。