小白觀點：電視迷港女盡情抽水

消防飛將軍勇救中女，只不過出咗兩吓散手，已經令到小市民拍爛手掌，有名你叫Firefighter啦，梗係Fight得兩吓啦！依家香港男少女多，再加上港女眼角高，一般病壞電車男、御宅族，佢哋點會睇得上眼吖！班港女睇得電影電視多，以為救火哥哥個個都係方中信、鄭嘉穎咁款，靚仔重情義唔在講，仲個個四十幾吋心口。

原來近距離接觸呢班帥哥，竟然話都冇咁易，只要得閒冇事爬出露台就得，救援過程可以盡情抽水，仲可以受佢哋幾嘢「愛的手刀」同「情深的批月爭」添！好心呢班消防唔好經常大顯身手啦，再咁落去就麻煩喇，一幢樓隨時有十個八個危坐，消防處增聘幾多人手都救唔晒啦！

網友觀點...X）...

海明

我就話抵打喇，佢一條命，差啲害埋幾個消防員條命，打暈就啱喇，不過後補嗰兩㬹又真係狼死咗啲。

發仔

消防員應該係救人喎，依家打到人重傷，早知不如跳落街好過啦。

大雄

今次消防員又斷正，成個過程拍得清清楚楚，個中女醒番一定告佢哋啦，諗定道歉台詞都得喇！

華少

消防員高空批(月爭)嗰幾吓勁度十足，中女執番條命仔算好彩。死都唔好玩跳樓喇，畀人打到變豬頭，半死仲慘呀。

網址：www.sunsiupak.blogspot.com

阿豪觀點:氣上心頭認錯係上司

真係奇怪，同樣係打，消防員打排球大家就鬼殺咁嘈，但係打企跳女子大家就拍爛手掌……

冇錯，消防鐵漢使用適當武力，可以避免企跳女子反抗而跳落街，係無可厚非。如果班消防係不安好心嘅，大可以扮晒嘢捉住個女人，然後順手推佢落街，仲要扮晒遺憾咁大嗌：「嗚……點解我救唔到佢呀……」但問題係，點解救人期間好似打唔夠咁，入到屋仲要「舂」多幾拳？

照計消防鐵漢同呢個弱女子無冤無仇，唔使咁落力㗎，比較合理嘅解釋可能係，消防員班飛將軍救人時得一條單繩保命，反映極上級都唔肯幫佢哋加裝備，一時氣上心頭，當個企跳女子係佢哋上司，咪起勢咁揼囉！

網友觀點...X）...

匿名

其實消防用武力對付個女人，真係情有可原，當時情況可能好危急，消防員一定要確定個女人冇還擊之力，先至出手打人，否則一跣手佢就會跌落街。

卜勤

消防員係超人咩？唔「舂」個醉酒自殺婦，咪一鑊熟齊齊做飛人？

Patrick Lai

如果證明消防員唔制服嗰個婦人，佢會飛落街嘅話，咁就真係無可厚非嘅……

joey

今次都算係紀律部隊最合理地打人嘅一次……

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。