呢嗱，連政府部門外判員工亦難逃一劫。二十幾個屋宇署外判合約文員尋日去發展局請願，抗議外判商大幅減人工。員工代表話，七月底公司再次投到政府嘅標，佢哋可獲續約，但月薪就由八千減到六千八。

嘩！份糧唔見咗一成半，全家人節衣縮食都唔掂，你話係咪打工仔悲歌吖。港府成日嗌創造就業，唔止做唔到，工人仲要畀無良僱主榨到開飯都成問題，保就業？噏吓就得。

屋宇署回應話，修改合約會對其他投標者唔公平，亦會損害招標制度嘅完整性。即係話，乜都唔關政府事。話口未完，又有工會接獲懲教署合約文員求助，話新合約承辦商要求由下個月起減薪。呢鋪仲勁，要減一成七，月薪由七千減到五千八。

叮！機電工程署、屋宇署、懲教署陸續爆出外判合約員工續約之後人工不加反減，將工作外判出去嘅政府，居然關人個關，咁同無良僱主有乜分別？有位受影響嘅屋宇署外判員工話，減薪對生活影響好大，仲質疑：「公務員減薪百分之五都話士氣大減，有冇諗過我哋點呀？」

港府乜都判晒畀人做，公僕咁得閒，照計應該好好做嘢啦。點知當局嫌佢哋唔夠梳乎，仲要繼續請人。港府招聘政務主任同二級行政主任，月薪分別約三萬六同二萬三。結果爭到打崩頭，有三萬三千人應聘，比舊年多咗近五成。

梗係啦，做公僕薪高糧準，捧住個鐵飯碗唔驚炒魷，同人工又奀、隨時畀人講聲「Out」就冇得撈嘅外判員工，簡直差天共地。至弊公僕貪得無厭，唔肯同市民共度時艱，薪酬趨勢調查顯示佢哋要減薪，即刻嘈到拆天，仲威脅要上街，簡直不知所謂。

金融海嘯啱啱一年，雖然股市樓市旺番啲，但前景係點連專家都睇唔通，隨時會再冚個浪埋嚟。財政司司長曾俊華早排居然亂噏，話香港過咗最壞情況，隧道盡頭已見到曙光。

叮！經濟有冇好轉，應該問吓普通打工仔，問吓畀人大幅減薪嘅外判員工，唔係聽班食飽無憂米嘅高官齋噏。依家每月入息低於三千七百蚊平均綜援金額嘅家庭已超過十九萬戶，佔全港家庭總戶數接近一成。淨係睇呢條數，已經證明鬍鬚曾搵笨。

貧富懸殊愈來愈犀利，睇吓公務員同政府合約外判員工待遇嘅差別，就知道乜嘢叫分配不公啦。港府對低下階層市民嘅困苦居然詐睇唔到，仲放聲氣話下個月嘅施政報告唔會派糖。

唉，有個淨係顧住自肥嘅政府，市民只能怪自己時運低咯。係噃，鬍鬚曾早幾個月同班問責高官一齊減薪，呢次突然唱好經濟，唔通想快快趣趣攞番足？叮！