嫻姐○三年年頭發現患癌，現已好番晒。佢尋日出席香港乳癌基金會嘅活動時憶述發病過程：「有次喺屋企換床單，覺得左胸好痛，心諗冇理由個胸會抽筋，做檢查先發覺左乳房患上癌症。」佢之後做手術切除左邊淋巴，又接受電療，依家食緊控制賀爾蒙嘅藥，西醫話要觀察七年，但中醫就話要睇成十年先穩陣。

佢話以前少做運動之餘，仲無肥膩食物不歡，依家就知道運動最緊要，所以每個禮拜都會抽兩、三日行山，又會聽老友汪明荃嘅勸告，唔好日日搏命工作，保持心境開朗。