梁朝偉以迷人電眼同殺死人嘅演技馳名，銀行公會主席兼滙豐銀行執行董事王冬勝（Peter）就以「銀行界梁朝偉」嘅美譽馳名，連失明嘅港大學生發展總監莊陳有都知道佢呢個外號，尋日喺個活動前公然取笑佢。Peter講笑咁話，如果佢真係梁朝偉就唔使做銀行界，可以收山啦﹗
Peter呢個講笑實在自謙啦，到底銀行大班同知名藝人邊個身家豐厚啲，真係要比過秤過至知。或者Peter唔使似梁朝偉都可以收山啦，問題只係佢肯唔肯咁早退隱田園啫。
講番尋日嘅活動，經濟動力立法會議員林健鋒、梁君彥同梁劉柔芬搞咗個「金融海嘯的反思」研討會，尋日喺港大舉行，頭炮請嚟Peter做講者，佢對住現場幾百名嘉賓同學生回顧咗對金融海嘯一周年嘅睇法，佢喺演講中公然塞錢落學生袋，提醒佢哋記住教育嘅重要性，金融海嘯畀人嘅警示就係每一個界別都可能瞬息萬變，只有教育至可以令人認識呢個變化多端嘅社會。佢仲呼籲同學仔，取得個人成功後一定要幫人。