民政事務局近排當黑，好似成為各界狙擊嘅目標咁，先係捲入俗稱「河蟹事件」嘅大澳社工涉嫌被施壓調職嘅風波，之後東亞運動會又接連爆出醜聞，尋日連好似同該局冇乜關係嘅法律界，都就刑事法援律師費問題搵民政事務局晦氣。
香港律師會尋日好罕有咁高調舉行記者會，狠批負責法援政策嘅民政局。兩年前先孭起法援政策嘅民政事務局本身已經要負責好多瓣政策，搞到尋日聲援律師會嘅社區組織協會主席何喜華都話，民政局已經變成政府嘅雜物房，凡係冇人想掂嘅厭惡性政策都質晒畀佢哋。
立法會聽日就會召開個案會議討論「河蟹事件」，有議員更聲言要引用特權法徹查事件，睇嚟德成局長想喺今次風波中全身而退絕非易事。