近期股樓交投暢旺，好多人都唔記得咗金融海嘯嘅苦楚，立法會地產及建造業代表石禮謙前日語重心長咁話，港人買股票時認為自己可以「大魚食細魚」，但唔記得後面仲有條大鱷隨時噬你一啖就會渣都冇，所以佢覺得依家最穩陣係買「磚頭」。
大舊石話如果港人有能力，應該買番兩層樓，一間自住，一間用嚟收租，長遠實有賺喎。立法會建築、測量及都市規劃代表劉秀成都好贊成大舊石嘅睇法，佢話香港地少人多，有樓揸手點都有着數，不過佢認為依家樓市升得太快、太急，擔心一旦出事，殺傷力仲大過Accumulator，呼籲港人量力而為。劉秀成同大舊石代表嘅業界專責起樓同賣樓，難怪佢哋會啱晒嘴型，齊齊唱好樓市啦﹗