港區人大代表馬豪輝好鍾意歌劇，有「人大歌劇王」嘅稱號，曾經拜師香港首席男高音兼聲樂家林祥園學唱歌。佢太太廖寶琼原來同佢志趣相投，不過，馬豪輝鍾意鬼佬歌劇，太太就鍾意中國粵曲，所以佢哋好少比試歌喉。前晚馬太喺大會堂踏台板，舉行粵曲音樂會，馬豪輝就冒住狂風暴雨，去後台做老婆嘅「粉絲」。
身為胡關李羅律師行高級合夥人嘅馬豪輝咁識做，但馬太仲有不滿，話老公唔得閒每朝陪佢吊嗓子練聲，反而屋企隻狗仔夠義氣，發出嗚嗚聲陪佢練曲喎。雖然係咁，馬豪輝表演當日一早就到後台做「阿四」，為太太整理出騷衣服，又坐埋一邊欣賞太太化妝，夠晒體貼。
講番當晚嘅表演，馬太同姐姐廖寶玲、妹妹廖寶珊組成「三朵金花」登台，佢哋三姐妹向來行動一致，十年前一齊走去學唱粵劇，馬太是晚選唱小明星嘅《星韻心影》。本身係插花老師嘅佢，專登用兩晚時間自製八個絲花球點綴舞台，認真貪靚。