舊年呢個時候，金融海嘯爆發，本港財金官員表現得後知後覺，但政府一直唔認，傻強出席雷曼聆訊時自爆事後先知道迷你債券呢種產品，成為官場笑話。此後，傻強每次就雷曼事件發言都好審慎，小心翼翼驚再次講錯嘢，陳光譽尋日都質疑傻強過去一年背書居多：「陳家強喺年內發表嘅言論有幾多係佢自己嘅？我覺得佢似鸚鵡多啲！」

近半投訴未有下文

不過，喺雷曼事件上甩轆嘅官員又豈止佢一個呢？舊年鬍鬚曾一度話迷債只係個別事件，一年之後，證監會要同十六間銀行簽署文件推出回購計劃，向三萬幾個苦主變相賠償，呢個集體行動簡直狠狠咁摑咗佢一巴。

本身都係雷曼苦主嘅立法會議員甘威過去一年傷肝兼傷荷包，佢尋日話，金管局收到嘅二萬幾宗投訴個案中，有近半係與票據掛鈎投資產品嘅投訴，至今都未有下文，好多苦主仲喺苦海中浮沉。講到呢度，甘威好似巴士阿叔咁話：「呢件事根本未解決！」

一年過去，財金官員嘅表現乏善足陳，遲遲冇作應變，後知後覺嘅毛病更愈嚟愈嚴重，睇嚟海嘯嘅錯會一世留喺呢班高官嘅檔案上。