小白觀點：開特色賭場撼澳門

颱風「巨爵」擦身而過，大澳即刻浸到上心口，不愧有香港威尼斯之稱。其實大澳有咁得天獨厚嘅條件，唔使挖人工運河，又有咁多雪櫃浮吓浮吓，連Gondola都慳番，開賭力撼澳門嗰間都得啦！到時大澳漁民子弟個個可以做荷官，月入閒閒哋過萬，呢啲咪叫優勢產業囉。

不過，好多人一聽到個賭字會即刻起槓，為咗唔會引嚟嗰班盲光社反對，可向日本波子遊樂店學習，只係以物換物，唔涉及金錢賭博，反正大澳現成有咁多土特產，可以用茶粿做籌碼，輸淨又可以飽吓肚。當荷官大叫買定離手呀，一打開就見到有幾粒蝦膏：「哦，四、五、六點，大！」贏番十條八條生曬馬友鹹魚返去做手信都好㗎。

網友觀點...X）...

[　反恐暴族　]

可能得啲唔要命嘅Extreme Game愛好者至有興趣去風雨中的大澳一展身手！

[　阿倫　]

人哋威尼斯就話靚啫，你睇吓我哋香港威尼斯，倒瀉籮蟹咁，睇見就慘喇。

[　光頸李　]

大雨時大澳水浸就一直都知㗎啦，政府一早應該要治水啦，依家仲要等，唔通又要搞出人命先喊晒口出嚟咩。

[　敏兒　]

話晒都係旅遊景點吖，打風浸成咁，居民真係慘，咩都濕晒，電器都冇用啦，政府真係要正視吓呢個問題。

網址：www.sunsiupak.blogspot.com

阿豪觀點：發預警短訊免問責

次次打風，大澳都會變成澤國，今次「巨爵」襲港都唔例外。其實有時真係戥我哋做傳媒嘅慘，政府次次水浸完都大耍官腔，又話幾時可以起好個防波堤、又話會做好部門間協調，成架人肉錄音機咁，又唔見報紙可以照dup上次水災篇新聞、電視台可以播番舊片！

最搞笑係，民政事務總署署長陳甘美華話當大澳可能發生水浸時，會向居民發出預警短訊，提醒佢哋將貴重物品搬去較高嘅地方。呢個短訊嘅潛台詞係咪話：「嗱，依家浸就浸梗㗎喇，咪旨意政府幫到手保障市民生命財產，唔該自己執生。」咁以後警方係咪可以發短訊畀市民，提醒大家依家正身處罪案黑點，麻煩大家買定棺材呢？

網友觀點...X）...

[　奇雲士把拿　]

不如將環球片場個未來水世界劇場搬去大澳，吸引多啲遊客來港！

[　JAM紙兒　]

不如煲呔曾今次又坐直升機去視察啦，反正咁鍾意做show，又或者坐香蕉船去，拍套短片宣傳香港囉……

[　working class hero　]

其實唔止大澳啦，上環海味街咪又係次次浸到大大鑊，啲海味飄晒出嚟呢個奇景仲吸引遊客啦！

[　尖子　]

台灣水災有官要下台，但係香港年年打風，地方年年水浸，個個又好似冇件事咁，有冇搞錯？

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。