月薪七千 請遊泰國

該男僱主表示，師奶面試時自稱是單親媽媽，跟丈夫離婚多年，需供兒子在美國唸書，因其身世堪憐故決定以月薪七千元聘請她，較外傭薪酬高出近倍，沒想到對方竟是大話精。「佢入職半年已經問我太太借一萬蚊，仲叫我太太唔好話畀我聽。」他事後知悉師奶有賭錢欠債前科，便決定把對方辭退，惟被妻子好心勸阻，「我太太叫我畀多次機會佢，但借出嘅一萬蚊到依家都未還。」

男僱主直言，對師奶一直予以厚待，更視她為一家人，曾自費請她結伴同遊泰國，沒想到好心卻被出賣，「有親戚送畀我個仔一批金飾，好有紀念價值，但全部都偷走晒。」一朝被蛇咬，十年怕草繩，事後該名僱主已不敢再將門匙交予家傭，每逢外出都鎖好家中抽屜，但部分工人仍是「手腳唔乾淨」。最近他已改聘鐘點傭工，無奈地說：「依家請工人都請到怕。」