呢嗱，話說下個月滿五歲嘅軒仔，歲半時已開始有排便困難，個肚仔成日谷到脹卜卜，試過由兩、三日至去一次大便，變成八、九日至去一次，而且每次都要靠甘油輔助至得。佢爸爸諗住病向淺中醫，○六年帶軒仔去屯門醫院嘅急症室求醫。點知當值嗰個醫生求其睇吓，就話佢個仔身體冇問題。

喂，個肚谷到咁脹都冇事，唔係啩？為人父母梗係唔放心啦，醫生最後將軒仔轉介去同醫院嘅兒科專科醫生，輪咗七個幾月，專科醫生幫軒仔照埋X光，一樣冇發現問題，次次覆診都慣性處方甘油同埋纖維粉就算，始終醫唔好個病。

軒仔爸爸愈諗愈唔對路，索性帶個仔去私家醫院檢查，睇吓係咪真係咁棘手。誰不知人哋私家醫院醫生兩下散手，抽取咗軒仔直腸組織一驗就知，原來係患咗一種可致命嘅巨結腸病！

叮！因乜事公立醫院嘅專科醫生睇咁多次都唔知乜頭乜路，之但係一去到私家醫院就即刻現形，唔通真係要醫神至搞得掂嘅奇難雜症？

據港大外科學系小兒外科講座教授譚廣亨話，呢個病嘅病徵十分明顯，例如話持續便秘咁，其實醫生只要喺病人嘅直腸抽取組織化驗，觀察有冇神經細胞，已經可以下判斷。

譚教授話呢種病真係可大可小，因為巨結腸病可以引致腸塞，糞便塞喺腸內太耐，唔單止會倒流走向食道，仲有可能會引起腸炎，令細菌由腸管走入血液，造成敗血病，隨時會死人o架。

軒仔爸爸對公立醫院冇晒信心，寧願問人借錢，都要喺私家醫院做手術。呢個抉擇雖然使唔少錢，但絕對係非常明智。你知啦，喺公共醫療制度千瘡百孔嘅今時今日，唔好話斷錯症啦，公立醫院嘅醫療失誤個案多到得人驚，單喺八月，已經先後有三間公院發生四宗醫療事故！

嗱嗱嗱，話口未完，今年四月有個病人被東區醫院急症室醫生用胃喉插穿胃部，折磨咗幾個月之後，日前終於宣告不治，醫療失誤又添一新魂，問你怕未？

有乜辦法吖，鬼叫醫管局出晒名管理一塌糊塗，一味將大部分資源用喺管理層薪酬開支，前線服務資源不足，醫護人員做到嘔。醫生每周工時達六十五小時，個個都做到得閒死唔得閒病，試問仲邊有精神同埋時間睇症？點會唔出錯吖？

話時話，香港嘅公共醫療系統病到五顏六色，又屙又嘔，不如由太一叮幫手斷症好過，保證唔會斷錯症！因為只要抽取當中壞組織一驗，就知道罪魁禍首係食物及衞生局局長周一嶽，點醫？即刻叮爆呢個大毒瘤，自然不藥而愈啦。