港英餘孽緬懷殖民統治

尖沙咀鬧市有幢百年歷史英童學校，古物古蹟辦事處出奇咁冇將佢好似天星碼頭咁煎皮拆骨，反而霸咗嚟做Office。奇嘞，裏面唔係黃河仰韶文化遺迹，又冇一張乾隆皇坐過嘅龍椅，使唔使駐重兵，要由古蹟辦親身睇實呀？睇吓嗰個舊郵政總局，wow，夠有充滿文藝復興風格嘅石構建築啦，幾咁宏偉呀！之不過英國人當係草，一樣拎去填海！反而呢班港英餘孽比英國人更加緬懷殖民地統治，真係可惡到極。

為咗政治正確，本欄建議古物古蹟辦事處應立即搬去反英抗暴根據地元朗屏山達德公所。至於呢間英童學校嘅下場，一係做「港英罪證館」，一係拆咗起摩天大廈啦。

曲線保育用心良苦

古蹟辦將有過百年歷史嘅前英童學校改建成辦事處，惹嚟一片責難之聲。其實，今次大家真係錯怪好人喇！

大家有眼見㗎啦，唔理有幾多集體回憶、有幾耐歷史，政府話拆就拆，之但係政府部門落戶嘅建築物就唔同喇！好似話旺角洗衣街水務署同食環署倉庫咁吖，叫咗好多年都仲係賴死唔走；仲有依家佔用緊鰂魚涌公園嘅警務處同食環署等三個政府部門，都係遲遲唔肯搬，搞到公園都擴建唔到。

所以話，古蹟辦用前英童學校做辦事處，莫講話確保唔會被拆，假以時日，直頭有機會向聯合國申請成為世界遺產，絕對係曲線保育嘅一記妙着。

網友觀點...X）...

[　美芬　]

紅磚屋吖嘛，細細個已經影相影到大，不過都未入過去。對呢一代都好有價值㗎，真係好想入去睇睇。

[　晶晶　]

唓！呢個政府口口聲話保育，次次都係假保育，都唔係第一次㗎啦！

[　世傑　]

鬧市中嘅古蹟已經少之又少，紅磚屋又喺當眼地方，梗係最好開放畀人睇啦，又可作旅遊景點，班政府官真係豬咁蠢。

[　飛哥　]

古物古蹟辦班人識揀呀，揀幢咁靚嘅做Office。古蹟應該屬於市民大眾，偏偏就唔畀人入去參觀，咩道理呢？

[　卜勤　]

做辦公室，咪日日有古蹟辦嘅員工參觀囉。

[　客迭　]

唓，佢哋都唔係真心參觀，開工等放工之嘛，咪生人霸死地啦！

[　卜勤　]

識得欣賞古蹟嘅人唔多，古蹟辦嘅人識欣賞嘛。

[　at我啦　]

既然唔多人識欣賞古蹟，咁古蹟辦份工咪好筍？應該大幅削減佢哋八成人手啦……