15/09/2009

播放本新聞相關短片

政情:議員送機尾滯留慕尼黑

立法會東歐考察團喺當地尋日清早飛抵德國慕尼黑,準備喺上晝再轉飛捷克布拉格展開首站行程,點知即爆出笑話。

話說三名坐商務客位嘅議員梁家傑、陳茂波、葉國謙,同兩名立法會秘書處職員,懷疑因為掛住享受商務候機室嘅美酒佳餚同休息設施,而趕唔切登機,被迫滯留慕尼黑機場,最後搞咗成粒鐘先搵到另一班機,仲要自掏腰包補錢買機票,名副其實貪字得個貧。

問過其中一位失魂團友,佢強調佢哋聽到登機公布後,已立即拖行李走人,但冇預到機場原來咁大,趕到登機口時班機已離咗地,否認因大吃大喝或瞓過龍而轉唔切機。好在同樣坐商務位嘅另外三名團友,早兩日已飛抵當地籌備訪問工作,加上三名團友只係遲咗個零鐘,冇影響整體行程同各項官方訪問安排,否則事件分分鐘會變成國際笑話。

今次訪問主要係想了解當地嘅政治制度同政改經驗,包括喺今日同捷克國會嘅憲制及法律事務委員會會面,點知喺考察團抵達前,當地爆發憲制危機,政府決定解散國會提早舉行大選,但又畀憲制法庭裁定違憲,令會面被迫取消,改為同前國會議員非正式食飯交流。團長劉慧卿就發揮阿Q精神,話香港政界早前都討論過解散立法會問題,今次可以順道考察吓當地嘅實戰經驗,除笨有精喎。