阿John喺八六年出任新聞處處長，雖然只係做咗短短一年，佢都話呢份工好有挑戰性，任內仲經歷過兩件大事。第一件係當年嘅港督尤德爵士喺北京病逝，遺體運返港後搞嘅葬禮；第二件就係英女王最後一次訪港。佢話最深刻係面對英國一大班傳媒，因為日常好少接觸咁多外國記者，加上佢哋嘅要求同香港媒體又有啲唔同，搞到佢都有啲頭痛。

佢回想起當時有個場合，本身唔可以畀太多記者入去採訪，所以就由新聞處中央統籌，點知惹嚟外國傳媒不滿，希望可以攞番個好位。最後到底點拆彈，佢就笑笑口冇講到。