尋日喺一個活動度遇到中總副會長兼牛仔褲大王楊釗，講起金融海嘯嘅衝擊，對佢盤生意有乜影響呢？原來比想像中低，事關佢公司嘅整體定單只係比舊年同期下跌百分之十至十五。

跌幅咁細？唔止咁呀，佢公司嘅泳衣定單仲急增咗七成幾。褲王話美國對金融海嘯驚過龍，取消晒美國本土製造商嘅定單，反而將啲定單谷晒畀內地同東南亞，點計都係成本低啲嘛，就因為咁，所以咪因禍得福囉！褲王果然有福神照住喎！

褲王仲話依家有六成休閒服裝生意係內銷中國，即使出口定單有啲波動，都定過抬油，難怪佢話神州潛力無限，奉勸香港後生仔放棄「戀土心態」，搵工唔一定死守香港，大專生畢業後最好返內地大學攞番個碩士學位，建立內地資歷同人事脈絡，之後再加入上海同北京等大企業累積工作經歷。