15/09/2009

播放本新聞相關短片

政情:IT豪變身國產凌凌漆

作為「五散人」一員嘅立法會資訊科技界代表「IT豪」譚偉豪,今年因為不滿安排,杯葛唔去煲呔曾嘅施政報告諮詢會。唔見啫,喺外面嗌咪得囉,索性Call傳媒當面講吓佢嘅睇法。

IT豪話睇咗一本叫做《山寨來了》嘅書,大感內地以平同抄襲致勝嘅文化有得做。佢舉例話iPhone成功後,內地都出咗部類似嘅手機,而且銷情唔錯,令佢諗起內地一部外表似國產熊貓牌煙盒,其實係一部電話嘅物體,須知內地煙民多,既係煙盒又係電話,好方便內地同胞;仲有一部兼備驗鈔功能嘅手機,打電話之餘更可以驗埋銀紙添,甚至經堪輿學家開光嘅電話都有。

呢啲產品咁熟嘅?呵!咪就係類似電影《國產凌凌漆》裏面嘅平民化特工裝備囉,周星馳都話咪以為係鞋咁簡單,其實係一個風筒!IT豪簡直係國產凌凌漆上身呀!

按佢嘅大計,香港幫呢類充滿創意嘅手機攞版權、做外形設計同埋檢測認證,確保手機外形冇侵權外,品質亦有番咁上下,然後再利用港人擅長嘅市場推廣,將呢類手機推向國際。就算佢嘅大計搞唔成,下次周星馳拍戲都可以搵佢度吓橋吖,起碼算係推動六大產業中嘅創意文化產業嘛!

質疑推行六大產業能力

總括嚟講,佢認同六大產業嘅方向正確,但質疑政府嘅執行能力,所以記之曰「快、狠、準」。佢仲話政府要快啲請到創意總監之餘,政策上要大刀闊斧。

創意產業做得慢,但諮詢緊嘅《私隱條例》,佢就覺得政府行得太快,唔使急到要超英趕美嘅。事關政府建議將指紋、瞳孔呢類生物特徵列為敏感個人資料,令業界擔心好似唔鼓勵人用咁,加上香港嘅私隱專員吳斌唔識科技,業界下個月初會約見吳斌,佢仲會邀請識科技嘅加拿大私隱專員來港分享。