之但係香港迪士尼樂園行政總裁金民豪有個好令人振奮嘅消息，佢話除咗因為五月爆發人類豬流感疫情，令到樂園入場人數有顯著跌幅，但樂園今年初嘅入場人數有雙位數字增長，家陣入場人數仲有止跌回穩迹象添！

咦，突然間有咁好成績，真係要開香檳慶祝咯。之不過，大家唔好開心住，其實香港迪士尼今次公布嘅數字好有水分，原來目前港人旅客增多，佔樂園嘅整體入場人數四成，內地旅客同埋東南亞旅客只係各佔三成咋。

太一叮記得，當局當初要起個迪士尼樂園，唔係為咗畀香港市民休憩玩樂咁簡單。港府之所以不惜做敗家仔瞌埋眼簽落「喪權辱港」嘅不平等條約，無非係為咗要吸引多啲內地旅客來港，帶旺香港旅遊業之嘛。

真係估唔到，依家香港迪士尼衰到內地客都唔吼，竟要靠港人客源頂住，咁搞法等於塘水滾塘魚，頂得一時唔頂得一世，唔通要小市民一年去十次八次死撐住咩？

其實又唔怪得內地旅客唔嚟，鬼叫迪士尼樂園自己唔衰攞嚟衰咩。逆市加價不特止，仲分港人票價同旅客票價，內地客竟然要收貴啲，擺到明就係玩歧視，當內地同胞水魚咁撳，上過當仲有下次咩，唔返去家鄉唱衰都偷笑啦！

喂，咪以為天下間得一個香港迪士尼樂園，睇吓美國迪士尼樂園吖，地方大到玩幾日都未玩完。反觀香港呢個樂園都唔差，話晒都係世界之最o架，係乜？之唔係全球最細嘅迪士尼樂園囉。得豆腐膶咁大，玩到半日太一叮話你叻呀！

最弊係香港迪士尼都未識死，明知地方細係樂園嘅死穴，但對於擴建一事拖得就拖。直至政府貼埋大床做嫁妝將貸款變股權，再做多次敗家仔簽多次「喪權辱港」嘅不平等條約，先至肯落實整個擴建計劃，真係乜嘢先機都冇晒啦。

呢嗱，話口未完，美國華特迪士尼公司已經宣布用十億美元、即係約七十八億港元擴建美國兩個迪士尼主題樂園，包括擴大加州冒險樂園嘅遊樂設施，亦會將佛羅里達州奧蘭多夢幻世界擴大一倍。其餘嘅計劃包括更新兩個主題樂園「星球大戰三部曲」嘅景點，增加3D立體效果。

咁都唔止呀，仲有一個上海迪士尼樂園等住殺到，面積一樣大過香港多多聲，到時內地同胞使乜山長水遠嚟香港貼錢買難受吖！

冇辦法，鬼叫港府做咗迪士尼提款機咩，成班高官洗濕咗個頭，香港納稅人被迫一齊做老襯，迪士尼樂園都唔知何年何月至能夠回本。睇嚟呢個無底深潭仲有排填呀，香港人頂硬上啦！