尋日下晝兩點半，煲呔曾喺沙田馬場興高采烈咁頒獎，慘劇已經發生咗，但佢懵然不知。

佢兩公婆大約喺兩點九左右離開馬場，大批記者守候多時，問佢對三名工人死亡嘅睇法，但佢竟然茫然不知，仲反問：「喺邊度？邊度嚟o架？」

呢個時候，煲呔曾至猛然驚覺發生咗咁大件事，面容繃緊，上車前拉住隨行官員密斟咗成兩分鐘，之後一言不發上車，絕塵而去。唔知佢嘅辦公室點運作同溝通嘅呢？

三名工人證實不治後嘅兩個鐘頭，煲呔曾除低佢嘅紅色煲呔去到現場，佢耷低頭照稿讀，話對事件感到難過，不過遲到都好過冇到嘅。勞工及福利局局長張建宗都現身意外地盤，除咗講完佢嘅分內事，仲講埋人哋嗰份，搶閘預告話新鴻基地產會發恩恤金畀罹難者，每人一百萬元。