依家煲呔曾仲頭痛緊點搞禁毒，巴士阿叔提出政府要用市價百分之十嘅價錢，買晒毒販嘅毒品，再派番畀吸毒嘅市民，實行享用毒品非刑事化嘅同時宣傳埋禁毒。吓！咁瘋狂？

更瘋狂都有呀，巴士阿叔嘅建議仲包括解放煙禁，即係唔再禁煙嘞，又話要成立另類社團管理局嚟管理黑社會，其他政綱仲包括將香港變做「明珠股」上市，再分番股票畀市民，咁就係真正嘅還富於民喎！佢又認為應解散醫管局，改由民間組織做監管醫院嘅工作。睇巴士阿叔嘅政綱，足以證明佢創意十足，但要得到民心，似乎唔係咁容易嘞。

○六年喺巴士上以一句「有壓力、未解決」而成名嘅巴士阿叔，回歸前已想問鼎特首寶座，但一直都未能成功提名。巴士阿叔係咪可以做到下屆特首候選人冇人知，但肯定嘅係，佢係最早敢承認參選嘅「聲稱特首參選人」。