比賽分成三組，三位議員分別對壘，阿忠同歌星薛凱琪拍檔，有美相伴如有神助，逢答必中；英姐嗰組本來亦勢均力敵，可惜佢有甩漏吖！

話說主持問英姐嗰組連續幾多日嘅工傷假期需要向勞工處呈報，英姐嘅拍檔話係七日，當時英姐冇乜表示，咁即係默認係七日啦，點知原來係錯嘅，正確答案應該係三日。英姐話晒係勞工界嘅立法會代表，呢次竟然暴露咗唔係咁熟職安條例嘅底牌，真係老貓燒鬚囉！

大會再整多條難題考英姐，問佢為受傷人士做急救嘅處理步驟係點。英姐今年二月喺立法會大樓嘅樓梯叉錯腳跌傷，面對呢條問題應該當食生菜啦，毫不猶豫講出四個步驟，分別係先確定現場環境是否安全，接住係視察傷者情況，然後為傷者急救，最後就打三條九報警。點知主持人話英姐答錯咗最尾兩個步驟，正確程序係先打九九九再急救傷者至啱喎。

唔服氣引自己為例

英姐當然唔服氣，話梗係救人要緊，以佢當日受傷為例，立法會成班職員同議員第一時間撲出嚟救佢，之後先至打電話將佢送院。佢咁講查實冇錯喎，正所謂人命關天，遲咗幾分鐘搶救，分分鐘斷送一條寶貴性命。但大會始終有官方答案，英姐惟有認輸嘞。

至於IT豪就仲慘，得分最低，雖然佢喺賽前狂刨「職安健常識問答手冊」呢本天書，可惜點樣惡補都係不敵兩位嚟自勞工界嘅議員。又係嘅，職安問題始終唔係佢嗰瓣，所以當主持問佢知唔知影印文件時會釋放出乜嘢氣體時，佢答：「氮氣」，主持馬上糾正佢話：「係臭氧至啱喎。」咁即係證明佢刨唔熟書啦！