呢嗱，衞生署署長林秉恩呢次親自示範點樣補鑊嘞。日前十幾間母嬰健康院幫嬰兒補種肺炎球菌疫苗，竟然派錯劑量同年齡不符嘅退燒藥。百幾位家長報稱攞咗唔啱BB年齡嘅藥，其中二十七位話服用過。問題出喺當局臨時拉伕，將打針嘅任務交畀醫療輔助隊，林秉恩尋日先向受影響嘅家長同市民致歉，話署方責無旁貸，唔會推卸責任，仲叫家長唔好因為事件唔帶小朋友去打針。

林秉恩又話，為咗減少派錯藥嘅機會，幫嬰兒補種疫苗嘅注射員周日開始唔再負責派藥，會設派藥專櫃，由兩個人核對資料同分量，唔同年齡嬰兒嘅退燒藥亦會用唔同包裝。照咁講，打針派藥分開處理，又有專人核對，仲改埋包裝添，天衣無縫，想錯都難咯。

叮！咪做騷啦。如果班官真係咁醒，點會搞出個大頭佛？所謂新措施，咪同樣係由醫療輔助隊打針，佢哋始終唔同專業醫護人員，叫市民點恢復信心吖？為咗卸責，林秉恩強調事件唔涉及結構性錯誤，係因為注射員壓力大，「忙中有錯」喎。其實，如果人手足夠，注射工作由醫護人員執行，咁嘅錯又點可能發生？呢啲咪叫不打自招囉。

至弊林秉恩仲死撐，話醫療輔助隊喺沙士同豬流感防控做咗好多工作，公眾對佢哋要有信心。無獨有偶，醫管局主席胡定旭早排寫咗封公開信大吐苦水，貼晒喺公立醫院大堂，話醫療事故一單接一單，大家多年嚟努力建立嘅良好聲譽，因為無心之失受損，市民似乎唔記得醫護人員曾盡心盡力為香港服務喎。

叮！身為公共醫療系統高層，一個姓「叻」，一個姓「賴」，好似市民冤枉佢哋咁。冇錯，絕大多數前線醫護人員盡心盡力服務市民，大家有目共睹，但藥物事故、醫療失誤愈爆愈大鑊，同樣係事實，市民怪嘅唔係做到疲於奔命嘅前線員工，而係一手造成公共醫療架構上肥下瘦，卸責唔問責，對員工辛勞同病人安危麻木不仁嘅醫療衞生高官！

私人執業醫生犯錯，醫委會一定會追究專業責任，但咁耐以來，衞生署派錯藥、醫管局打錯針，三日一小錯，五日一大鑊，幾時見過醫療高官會上身？幾時見過有人問責落台？

有專業人士質疑，呢次補種肺炎球菌疫苗，衞生署將打針派藥嘅醫療程序交畀非專業嘅醫療輔助隊負責，係專業失德。林秉恩事後唔主動問責，又想靠補鑊代替孭鑊，仲堅拒由專業醫護人員協助注射。咪話太一叮唔提醒班高官吖，如果衰多鑊，除咗鞠躬落台，冇第二條路可行。叮！