馬會九大高層嘅年薪有成六千四百萬元咁多，其中CEO應家柏嘅年薪仲勁過金管局總裁任志剛，有成千四到千五萬。消息曝光後，馬會嘅高薪厚酬惹嚟好多議論，馬會主席阿John陳祖澤尋日喺香港會食完飯出嚟，就幫下屬講說話，話佢哋物有所值。
阿John話香港好多CEO嘅薪酬都公開，仲話馬會董事局素來好有系統，有做薪酬巿場調查，並以巿場中位數薪酬作公開招聘，董事局都覺得呢班高層嘅薪酬、花紅好合理。
查實阿John當年做九巴揸Fit人時都係打工皇帝一名，不過佢就透露自己嘅人工唔夠應家柏嚟，事關份糧要視乎公司經營狀況。翻查○三至○五年嘅資料，阿John嘅年薪大約有千二萬多啲。
