已屆退休之齡嘅湯顯明鬼祟轉型為合約僱員，續任廉政專員，事件曝光後惹嚟好多爭議，但政府高層唔肯坦白交代事件。尋日煲呔曾同公務員事務局局長俞宗怡（D姐）喺同一時間現身香港會，我哋追問D姐會唔會公開澄清湯顯明件事，D姐笑笑口，一味耍手擰頭。
政府高層雖然三緘其口，但湯顯明鬼祟轉制件事卻已成為立法會關注嘅事，唔同黨派都話有關注，只等十月復會後，就會捉相關人士上立法會交代，煲呔曾同D姐聚吓頭、夾吓口供，對將來應變都有好處嘅。只係，湯顯明由公務員轉為合約人士，將來上立法會解畫嘅官，似乎應該係煲呔曾多過係D姐喎！