新學年拉開序幕後，中文大學亦進入變動期，首先係中大校董會主席換人。政府尋日刊憲，委任滙豐亞太區主席鄭海泉下月起接替鄭維健做校董會主席，為期三年。唔講唔知，鄭大班亦係首位擔任校董會主席嘅中大校友，中大人掌中大，呢個安排令好多中大人都充滿期待。
鄭大班接任之後，最快迎來嘅挑戰可能就係遴選校長，事緣同師生嘅關係都唔多愉快嘅中大校長劉遵義出年七月退休，校董會主席係校長遴選委員會主席。前中大校董會成員張文光七八年喺新亞書院畢業，係鄭大班師弟，佢話讀書時已聽過鄭嘅大名，大讚校董會今次深慶得人，以鄭大班喺商界、政界嘅人脈，相信可以選到一位更接近中大人心嘅校長。新亞校歌其中一句係「廣大出胸襟，悠久見生成」，希望新校長有呢種精神啦。
講番鄭大班，佢七三年畢業於中大經濟系，其後喺新西蘭取得經濟學碩士。佢大學時期已活躍於學生運動，係第二屆中大學生會副會長、新亞書院時事學會會長，曾因為參與盲人工潮同糖街居民事件，被港英政府政治部列入「危險人物」黑名單。