富貴黨前副主席「莎姐」周梁淑怡嘅電視清談節目《周梁有請》，今晚訪問政務司司長唐英年，莎姐同唐唐分屬前黨友，訪問全程客客氣氣，不過唔代表冇料到，「疑似」特首候選人唐唐喺節目中罕有咁暢談下屆特首條件，強調一定要得公務員同工商界支持，呢兩瓣都係佢嘅叫胡優勢。咁講法，即係話為自己度身訂造啫！
莎姐本來係問唐唐對下屆特首管治團隊嘅睇法，唔知唐唐係咪太心急為自己賣廣告，講講吓竟然「跣軚」，大講特首應有嘅三大條件，話下屆特首團隊要專業、有經驗、有效施政，佢大讚公務員有效率同廉潔，所以一定要得公務員支持；又話香港係經濟社會，得到工商界嘅普遍支持亦好重要，兼要對弱勢社群有承擔咁話。按照呢個講法，另一位「疑似」特首候選人梁振英（CY）咪好輸蝕？
莎姐跟住又問唐唐，係咪只有同中央交心嘅人先至勝任特首，呢條問題嘅矛頭好似又係對準CY。唐唐答話做特首嘅基本條件係愛國愛港，「亦即係話，要喺香港得到香港市民嘅支持」，暗指CY仲要多多努力。不過，唐唐始終猶抱琵琶半遮面，唔肯講係咪打算選特首，總之一味話打好呢份工先再講。