前警隊一哥李明逵（Dick）退出江湖後，每日逍遙人生，尋日卻見佢現身中區警署，原來退下火線嘅佢要繼續為警隊効力。事緣發展局文物保育專員辦事處最近搵佢做顧問，為保育舊警署提供寶貴意見，即係要佢做舊警署嘅活字典。阿Dick話自己喺灣仔警署同大埔警署都做過，對呢三間舊警署特別有感情。
中區警署尋日舉辦舊建築歷史照片展，阿Dick應邀出席兼舊地重遊，佢話早喺七四、七五年間做偵緝督察時，就係駐守中區警署，仲即時指出當年坐邊間房。間警署三十年嚟外貌冇變，最近佢都同古物古蹟辦事處人員嚟過，佢口述歷史，講番間警署以前係點嘅樣。
搵阿Dick話當年真係冇錯㗎，佢話中區警署以前有間飛髮舖；七十年代中後期，報案室地底發現過戰時炸彈，一度要引爆；而且間警署附近有裁判署同羈留室，可以提供一條龍服務添！不過佢都話以前嘅警署設計得守衞森嚴，令人好怕去差館，家吓就唔同喇。