保安局職員東奔西跑

政府啱啱公布咗《公務員守則》，希望釐清問責官員同公務員之間嘅權責同合作規則。按照守則，冇副局長嘅問責局係由行政長官指示另一位問責局長代行職務，不過具體實行問題多多。好似今個月六號起，光哥趁立法會休會期外訪北京、青島同廣州，返嚟後又要出發去印度出席一個簽署法律互助協議嘅活動同放假，所以六號到二十一號佢大部分時間唔喺香港。

所以Eva由六號至十二號幫佢頂更，一個禮拜後輪到周一鑊由十三號頂到二十一號，兩個人都係大約做一個禮拜。點解一定要分兩個局長署任呢﹖冇人答到呢個問題，只係保安局嘅公務員呢兩個禮拜要東奔西跑，今個禮拜搵東家，下個禮拜找西家。

睇番以往問責局長署任其他局嘅工作時間都比較短，或者只係落吓立法會，原因或與頂更頂得多、容易孭鑊兼上身有關，又或者問責局長大都有自己嘅繁重公務，所以今次光哥離岸，就由兩個局長一人捱一個禮拜啩！

問題係問責高官用呢種搓乒乓波式嘅手法署任，雖然可以減少風險，但就玩殘咗一眾公務員。高官問責制落實咁多年來，問責層面嘅署任安排依然亂晒龍，官場中人真係多得煲呔曾唔少！